MAKILALA, North Cotabato -- Diriyot na nga matukob sa malala nga banakon (King Cobra) ang usa ka ulitawo alas 4:00 sa hapon niadtong Lunes, Enero 20, sa nahisgutang probinsiya.

Gibutyag ni Joseph Paulo Morales nga samtang nagmotor siya gikan sa palengke ug pauli na sa iyang gipuy-an, pag-abot niini sa Barangay Kawayanon sa Makilala, iyang nakit-an ang dako ug taas kaayo nga King Cobra.

Gipakusog og pagpadagan sa ulitawo ang motorsiklo ug giligsan ang lala nga banakon.

Gipunit ni Morales ang King Cobra ug gisulod sa sako diin iya kining gidala sa pag-uli sa ilang balay.

Apan sa diha nga giabrihan sa amahan sa ulitawo ang sako, nadiskubre nga buhi pa ang banakon, hinungdan nga gitigbas kini tumong sa ulo.

Ang King Cobra dunay gitas-on nga pito ka tiil ug dunay mga mahait nga ngipon.

Kahinumdoman nga dunay namatay nga tawo human napahitan og banakon sa nahisgutang lungsod ug sa Magpet sa nahisgutang probinsiya.

Nagpasidaan ang mga opisyal sa probinsiya sa mga molupyo sa kabukiran, ilabi na sa tiilan sa Mt. Apo, nga igmaton ang ilang kaugalingon batok sa King Cobra.