NALIPAY ang mga Dabawenyo sa gihimong simulation activity kagahapon sa buntag sa Francisco Bangoy International Airport ning dakbayan sa Davao gumikan moabot na gayod ang bakuna sa Covid-19 sa di madugay.

Una niini, gibutyag sa Malakanyang nga ning hinapos sa bulan sa Pebrero mangabot na sa nasud ang 117,000 doses sa Pfizer/BioNTech vaccine nga mahatag "two doses 28 days apart" nga alang sa 58,500 ka mga indibiduwal.

Sa Davao City Miyerkules, Pebrero 10, 2021, gihimo ang aktibidad kung paunsa ang pag-transport sa mga Covid-19 vaccine gikan sa pagtugpa sa eroplano, sa pagdiskarga ug sa pagpahiluna sa paghatud sa storage niini SPMC Molecular Biology Laboratory.

Usa ang Department of Health Davao Region ang nanguna sa programa kagahapon sa buntag, Pebrero 10, 2021.

"Nalipay gyod, kaluoy sa Ginoo moabot na gyod ang vaccine nga maoy gihulat sa tanan aron luwas na ta ning Covid, ug aron mabalik na gyod atong tinuod nga normal nga panginabuhi," ingon ni Marissa Navalez, residente sa Piapi Boulevard, siyudad sa Davao nga nahinabi sa Superbalita Davao Lunes.

Pagkahuman sa airport, gipakita ni SPMC Chief medical technologist Zenaida Banzon ang mga freezer alang sa Covid vaccine sa SPMC.

Sud sa pasilidad, anaa ang duha ka -40° Celsius freezer (Moderna), ug usa ka -2 to -8° Celsius freezer diin suma ni Banzon ang -80° Celsius freezer alang sa Pfizer vaccine wala pa maabot sa siyudad.

Niadtong Miyerkules, ang Inter-Agency Task Force for the Management of Emerging Infectious Diseases ug ang National Task Force Against Covid-19 nagpahigayon sab og simulation alang sa arrival ug pag-transport sa mga vaccines didto sa Ninoy Aquino International Airport.