ANAA sa heightened alert status ang kapulisan sa dakbayan sa Davao human mapatay sa otoridad ang lider sa Dawlah Islamiya Digos Cell ug ang igsoon niini, atol sa gipahigayon nga operasyon sa hiniusang pwersa sa otoridad Domingo sa gabii didto sa Brgy. Aplaya, Hagonoy Davao del Sur.

Sumala ni Police Senior Inspector Ma. Teresa Plaza-Gaspan, tigpamaba sa Davao City Police Office (DCPO) nga hugot ang seguridad nga gipatuman sa Davao City ilabi na sa mga checkpoint pasulod sa sentrong bahin sa dakbayan.

"Wala gyod ta gakompiyansa, ug tungod niini, hugot ang atong koordinasyon sa AFP para masiguro nato nga dili makasulod ang mga terrorista sa Davao," pahayag ni Gaspan.

Sa pagkakaron doble kayud usab ang mga sakop sa intelligence unit aron nga mabantayan ang mga plano sa mga teroristang grupo.

"Target hardening atong ginabuhat karon para nga dili gayud ta malutsan," pagpasiguro ni Gaspan.

Sa karon ang kapulisan wala naka-monitor og presensya sa mga terorista sa Davao City. (Richy Nalagon)