WALAY kabutangan sa kaguol sa usa ka seaman dihang duna siya'y gihambin nga balatian human siya gibaharan sa usa ka babaye nga kung di magpakita ug di magpakasal kaniya, barangon siya.

Ang 48 anyos nga si Hermalito (bansagon gitago), taga Barangay Maa, Davao City, ang midangop sa kapulisan sa San Pedro Police Station niadtong Miyerkules aron ipa-blotter ang babaye nga taga Barangay 5-A-Bankerohan, Dakbayan sa Davao.

Gibutyag sa seaman sa duty desk officer nga si alyas Marimar ang iyang pasanginlan sa nadangatan niya nga pagdako sa iyang tiyan ug nag-yellow ang iyang pamanit.

Giingon nga nakaila niya si Marimar sa Facebook diin wala pa sila nagkita.

Gusto suma pa sa babaye nga makigkita apan nahadlok ang seaman kay misulti ang babaye nga mambabarang siya.

Gusto sa babaye nga magpakasal sa seaman apan dili mosugot ang seaman kay gawas nga minyo siya, nahadlok sab siya ni Marimar.

Dugang nasayran nga dako ang kaibog sa seaman kang Marimar kay guwapa kini, batan-on og nawong bisan pa og 55 anyos na.

Apan dili na sab makontak sa seaman sa Facebook ug bisan sa cellphone si Marimar, hinungdan nga nagpa-blotter na lang kini sa presinto sa pulis.