USA ka maestro ang giingong uwahing namatay sa nahitabong diarrhea outbreak sa Toril District, Davao City.

Sa post sa usa ka Dara Mae Olbes Villamorin kaniadtong Hulyo 21, 2022, gipahibalo niini ang pagpanaw sa usa ka maestro nga si Paul.

Sa post niya, giingon niini nga ang biktima kanhi niya adviser ug magtutudlo sa pipila ka subjects kaniadto sa Saint Peter's College of Toril.

"Unfortunately, he was affected by this diarrhea outbreak in Toril. He was once a light in our school years and it is our time to give back the light," suma ni Villamorin sa iyang post.

Uban sa post ang pagpangayo sab nila og pinansiyal nga tabang nga ipaambit nila sa nabiyaang kabanay sa kanhi magtutudlo sa SPCT.

Sa miaging adlaw, usa sab ka 67-anyos nga lalaki ang nakumpirmang namatay tungod sa balatian, nga gisundan sa 10-anyos nga bata nga unang gikataho nga biktima.

Subay sa pinakaulahing datus, Hulyo 21, anaa sa 218 ang apektado sa diarrhea outbreak sa Toril. (Jeepy P. Compio uban sa taho ni Cheche Diabordo, KAMM Media Network)