MIDUYOG ang Department of Health in the Davao Region (DOH-Davao) sa special vaccination days rollout gikan sa Septyembre 26 hangtud 30 aron dugangan ang gidaghanon sa pagbakuna og anti-Covid-19 booster dose sa rehiyon.

Ang Bakunahang Bayan special vaccination dungan nga gihimo sa nagkadaiyang lugar sa rehiyon, naglakip sa malls, gymnasiums ug mga tulunghaan.

Pipila sa mga lugar nga naapil mao ang SM City Davao, SM Lanang Premier, ug Ayala Abreeza Mall sa Davao City alang sa mall-based nga pagpamakuna.

Sa Matanao, Davao del Sur, gihimo kini sa Donganpekong Gymnasium samtang sa Barangay Mankilam Gymnasium ug Magugpo Pilot Central Elementary School sab sa Tagum City.

Pangulo sa Covid-19 Vaccination Cluster sa Davao City nga si Dr. Joy Villafuerte nagkanayon nga tanang age groups ug kategoriya makapahimulos sa primary ug booster doses atol sa maong mga adlaw.

Sukad Septyembre 26, ang coverage sa Davao Region alang sa kompletong booster dose, o kadtong nakadawat sa second booster dose, naa lang sa 5.3 porsiyento o 101,322 sa 3,302,600 ka indibiduwal kinsa mga fully vaccinated uban sa primary dose.

Alang sa unang booster, ang coverage naa sa 32.2 porsiyento o 610,454 ka indibiduwal.

Sa Davao City, gisulti ni Villafuerte nga ang coverage sa booster doses nagpabilin nga ubos bisan sa 100 porsiyento nga fully vaccinated nga indibiduwal, nga naa sa 43 porsiyento sa kinatibuk-ang 1,338,383 nga fully vaccinated.