DIGOS CITY -- Nagsugod na pagdagsa ang mga donasyon aron hatagan og mga gamit ug pagkaon ang anaa na sa 4,012 pamilya kun 1,772 indibidwal nga mga biktima sa pagbaha sa pipila ka mga barangay ning dakbayan.

Usa mga mihatag og 1,704 nga mga sinina ang Gaisano Mall of Digos, niadtong Lunes, usa ka adlaw human ang dakong baha niadtong Dominggo sa gabii, Hunyo 28.

Mitabang sab sa rescue assistance ang unom ka mga lokal nga gobyerno sama sa Bansalan, Sulop, Kiblawan, Malalag, Matanao sa Davao del Sur ug probinsya sa Davao Occidental.

Apil sa miresponde ang Philippine Red Cross, Bureau of Fire Protection, Philippine National Police ug Philippine Coast Guard ingon ang man ang dakbayan sa Davao.

Dungan niini, giabisohan ni Mayor Josef Cagas ang mga molupyo kilid kasapaan ug mga duol sa pangpang nga mohiklin na dayon panahon sa kusog nga pag-uwan aron malikay sa disgrasya.

Gitataw ni Cagas nga padayon pa ang rapid damage assessment sa lokal nga gobyerno human nga daghang imprastraktura ug kabalayan ang nadamyos atol sa pag-awas sa Caños River.

Subling mi-landslide sab ang pangpang nga parte sa Barangay Binaton ug pipila ka parte sa Brgy. Kapatagan ug mga sitio sa Barangay Managa sa lungsod sa Bansalan, Davao del Sur ug uban pang dapit sa siyudad.

Mapasamalaton ang mayor human daghang rescuers ang mitubag sa panawagan sa lokal nga gobyerno diin gibuhis sa matag usa ang ilang kinabuhi aron lang maluwas ang mga naipit nga residente gikan sa kusog nga boltahe sa tubig baha.

Samtang, gitataw ni Samuel Miralles, action officer sa City Disaster Risk Reduction and Management, nga dugay mihubas ang tubig gumikan sa high tide sa kadagatan niadtong higayona.

Giangkon ni Miralles nga aduna'y mga menor lang nga mga samad ang nahiagoman sa ubang biktima apan dako ilang pasalamat nga wa'y kinabuhing nakalas tungod sa paspas nga pag-responde.

Daghan sa mga biktima ang nawad-an og mga sinina ug tsinelas human gianod sa baha mao nga usa kini sa gikihanglang tabang sa matag indibidwal.

Sigon sa kasaysayan, ang uwahing pagbaha nga nasinati sa dakbayan mao ang pinaka-grabe human nakasinati sab og grabeng baha pito ka tuig na ang milabay.

Diriyot gianod ang tulay sa Digos River o mas nailhang Caños River human misangko na sa ibabaw ang tubig sa sapa.

Ang mga Barangay Aplaya ug Cogon, hilabihan nga naapektuhan mao nga mikatkat sa atop ang mga biktima tungod kay miabot sa 1.5 metros ang gilawmon sa tubig nga nakasud sa ilang balay.

Nasayran nga apil sab sa nabahaan ang lungsod sa Hagonoy, Davao del Sur human mitaas ang tubig sa Guihing River.

Ang ubang mga biktima nakahimo pa pagpangayo og tabang gamit ang social media. (Orlando B. Dinoy)