GIKASOHAN na Miyerkules, Abril 21, 2021, didto sa korte pinaagi sa summary inquest proceedings og kasong Reckless Imprudence Resulting to Homicide ang drayber sa dump truck nga nakaligis sa usa ka tuig-tulo ka bulan nga bata.

Sumala ni Davao City Police Office (DCPO) spokesperson Police Captain Rosario Aguilar nga gi-inquest na sa City Prosecutors Office (CPO) ang suspek pinaagi sa San Pedro Police Station.

"Na-inquest na ang suspek sa CPO sa kasong Reckless Imprudence Resulting to Homicide," ingon ni Aguilar sa Superbalita.

Kahinumdoman nga walay kabutangan sa kasubo ug kapungot sa pamilya ug kabanay sa biktima human nadisgrasya nga nalatayan sa dump truck alas 8 sa buntag niadtong Martes didto sa Purok 5, Barangay 76-A, Bucana Davao City.

Subay sa report, giingon nga ang inahan nga si Michelle na-busy sa canteen duol sa nahitaboan samtang ang amahan nga si Ronald, namahaw.

Dugang nasayran nga gipabantayan ang biktima sa 8-anyos nga ig-agaw niini, apan nalipat sab kini ug wa makabantay nga milakaw diay ang bata padung sa kalsada. (Jeepy P. Compio)