IGACOS, Davao del Norte -- Tingkagol sa prisohan ang usa ka estudyante kinsa mi-sideline og paninda og shabu.

Nasikop mao si Cude Labustro Cabase, 18-anyos, human positibo nga namaligya og shabu didto sa Purok 2, Barangay Tagpopongan, Babak District, Island Garden City of Samal (Igacos), alas 8:00 sa gabii niadtong Sabado, Septiyembre 28.

Sa report nga nakuha sa Davao del Norte Police Provincial Office, nasayran nga ang suspek nasikop pinaagi sa mga personahe sa Igacos PNP atol sa gilusad nga buy-bust operation sa lugar.

Nasakmit atol sa operasyon nga usa ka pakite sa gituohang shabu nga adunay gibug-aton nga .0349 gramo ug buy-bust money nga P500.

Ning kasamtangan ang maong dinakpan gikustodiya sa Igacos PNP samtang giandam ang kasong paglapas sa Republic Act 9165 kon Comprehensive Dangerous Drugs Act of 2002 didto sa korte. (Dexter T. Visitacion)