DAVAO DE ORO -- Gireklamo ang usa ka estudyante nga napakyas pagbayad sa iyang taya sa online sabong nga balor og tunga sa milyon ka pesos sa tagdumala sa Bong Fours Isobel Online Gaming place didto sa Sitio Maligaya, Barangay Binuangan, Maco alas 8:00 sa gabii niadtong Martes, Oktubre 26.

Ang suspek giila nga si Erick John Somadela Suelto, 19, ulitawo, molupyo sa Purok 3, Poblacion, sa nahisgutang lungsod.

Nasayran nga ang supervisor sa Bong Fours Isobel Online Gaming place nga si Jerrelyn Rotimas Acosta nangayo'g tabang kang Police Staff Sergeant Jaymar Rotimas kabahin kang Suelto nga giingong wa makabayad sa iyang pildi sa online sabong nga kantidad og P561,000 ngadto kanila.

Matud pa nga human nasusi ang maong sumbong, gilayong gisikop sa nahisgutang pulis ang suspek ug dayong gitunol ngadto sa Maco Municipal Police Station samtang giandam na ang tukmang kaso nga ipasaka batok kaniya.