SUTAON sa Davao City Police Office (DCPO) ang nakuha nga taho nga ang suspek sa pagpatay sa chief executive officer (CEO) sa Crowd Royals Real Estate Services, Armando Oppus, kanhi pulis sa dakbayan sa Davao.

Kini subay sab sa inisyal nga imbestigasyon sa kapulisan sa Police Regional Office (PRO)-Central Visayas base sa gitaho sa Balamban Municipal Police Office, pangulohan sa hepe niini nga si Police Major Christian Torres.

Sumala pa nga nga dunay nag-private message sa nahisgutang police station pinaagi sa ilang Facebook page nga nagkanayon nga ang pulis giingong nag-absent without official leave (AWOL) nga ila pang sutaon pinaagi sa pagpakig-alayon sa siyudad sa Davao kon unsa kini ka tinuod.

Hinuon, gipasalig ni DCPO spokesperson Police Captain Ma. Theresita Plaza-Gaspan nga kon ugaling masayran nga kanhi gyud pulis sa DCPO ang nag-unang suspek sa pagpatay sa CEO, matabangan nila ang Balamban PNP sa imbestigasyon.

Sumala ni Plaza-Gaspan nga dako ang kahigayonan nga ang kaso mapasaka didto sa Sugbo gumikan kay didto man nahitabo ang krimen. Apan giklaro niya nga ang kasong administratibo dili na mahitabo kay sibilyan na siya kung ugaling nag-AWOL siya.

“If atong makita ug masuta nga kanhi sa DCPO siya na-assign, atong matabangan ang Balamban PNP paunsa masikop ang suspek,” ingon ni Gaspan.

Kahinumdoman nga si Oppus, kuyog ang lain pang mga kauban nga sila Edmond Bariga Qui¤ones ug Judy Ann Dalatina-Estrella una nang milayas human giingong gibitbit ang kapin kun kulang P400 milyones gikan sa mga investors sa kompaniya gikan sa Davao Region niadtong Hulyo 27, tuig kasamtangan.

Tungod niining mga kasayuran, nagtuo ang mga awtoridad nga dunay kalabutan sa kasong large-scale estafa nga gikalambigitan sa biktima ang hinungdan sa pagpatay.

Giingong napasaka na ang kaso ngadto sa korte apan wala pay nigawas nga warrant of arrest batok sa mga nahisgutan. (WGM/JPC)