NISANG-AT og certificate of candidacy (COC) niadtong Huwebes si Davao del Norte 2nd District Rep. Antonio "Tonyboy" Floirendo Jr. aron subling magpapili isip kongresista sa 2nd congressional district sa Davao del Norte.

Uban ni Floirendo, miduso sab og COC ang laing lima ka kandidato isip board member sa ikaduhang distrito.

Si Floirendo modagan ilawom sa regional political party nga Hugpong ng Pagbabago (HNP).

Wa pa mopakita ang kandidato sa HNP alang sa 1st congressional district.

Suma ni Davao del Norte Governor Anthony del Rosario nga giplantsa pa nila ang ilang linyada partikular sa pagka-gobernador ug bise gobernador.

Nasayran nga mopasaka og COC ang gobernador sa Oktubre 15.

Apan gibutyag ni Rep. Floirendo nga bukas sab siyang mopapili isip vice governor kung walay mapili ang ilang partido.

Niya pa, puwede niyang hangyuon ang anak nga si Gabby nga modagan sa Kongreso kung gikinahanglan. (RGV)