GIDID-AN sa Philippine Coast Guard (PCG) nga molawig ang mga panagatang bangka ug uban pang gagmay nga mga sakayan aron nga malikayang malunod tungod sa dagkong mga balud nga resulta sa hanging habagat.

Ang kusog nga balud maoy hinungdan sa daghang mga indibiduwal nga daplin sa baybayon sa siyudad nga mobakwit human nga ang ilang mga balay gilampurnas.

Samtang nagpadayon ang habagat, si PCG Davao Station commander Commodore Garry D. Laynesa nag-alerto na sa mga mananagat nga magbantay sa paglawig sa Davao Gulf tungod sa maong kahimtang kay mga bangka di makasugakod sa kusog nga balud apan wala hinuon sila mokanselar og mga biyahe.

"Actually, mainit naman ang panahon natin ngayon, then medyo malaki lang ang alon sa bunsod ng habagat na pina-igting pa ng Tropical Storm na Hanna pero generally, fair weather naman," tin-aw sa opisyal.

Gisulti niya nga ang pagpagawas og suspensiyon sa mga biyahe o paglawig, ila unang susihon ang pahimangno gikan sa Philippine Atmospheric, Geophysical, and Astronomical Services Administration (Pagasa) kon dunay weather advisory.

"Ang advisory lang namin is 'yong fishing boats na maliliit, dini-discourage namin silang kung sa tingin nila delikado," dugang pa niya.

Sukad niadtong Sabado, Agosto 3, mga molupyo nga nagpuyo daplin sa baybayon padayon nga gibayo sa dagkong mga balud nga di normal sa naandan.

Sa pagsuwat ning balita, wala pa hinuon sila makatala og bisan unsang aksidente sa sakayan sa dagat dinhi sa Davao City. (Juliet C. Revita)