MITIMBANG og 5.4 kilos ang nasikpaw nga giingong "giant tilapia" sa punong alas 2:30 sa hapon, Dominggo, Hunyo 27, 2021 sa Kidapawan City.

Gibutyag ni Kapitan Eduardo Umpan sa Barangay Balabag sa nahisgutang siyudad nga ilang gipahubsan ang ilang fishpond aron nga manguha og tilapia ug itumod sa merkado publiko.

Apan samtang nanakop og tilapia, dako ang ilang kakurat gumikan ilang nakita ang giant tilapia nga nagkapay-kapay hinungdan nga nagkapuliki sila og dakop niini.

Dali gilayong gimatada ang isda ug giluto pinaagi sa nagkadaiyang putahe sama sa pagsugba ug pagpaksiw.

Nasayran nga ang cultured tilapia, o binuhi nga tilapia, matud pa, mas modako kon maghinobra ang pagkaon niini.

Ang tilapia giingong sama sab kini sa Pangasius nga matang sa isda nga mora og iho nga ang gigikanan mao ang "cream dory fillet" nga sagad giluto sa mga restawran.

Modako sab ang Pangasius kon dunay igo nga pagkaon sa ilang controlled habitat.

Ang tilapia gitawag sab og tilapia nilotica, o nile tilapia, gumikan naa na kini biblikanhon nga panahon didto sa Nile River nga karon naa sa nasud Egypt.

Sumala pa ang pag-culture sa tilapia naa na ilabi na sa karaang Ehiptohanon o ancient Egyptian.

Ang nakuha nga giant tilapia sa Kidapawan City maoy pinakauna sa probinsiya sa North Cotabato.