MITAHAN gumikan naa kanunay sa iyang hunahuna ang konsensiya ug misulay pa kini og pakamatay tulo ka higayon ang suspek sa paglugos ug pagpatay sa 47-anyos nga cosmetics manager nga si Christine Sunga Corpuz, suma sa Davao City Police Martes sa buntag, Hulyo 27.

Sa usa ka hamubo nga ambush interview kang Davao City Police Office (DCPO) Director Colonel Kirby John Kraft, gibutyag niini nga nakonsensiya ang suspek ug giangkon niini nga siya ang mipatay human siya hubog ug lango sa ilegal nga druga nga shabu niadtong takna sa krimen.

"Nagtago siya. Simula nga po noon, nag-try pa siyang magpakamatay, mag-suicide ng tatlong beses. Yong konsensya niya ang binagabag siya. Naka-droga siya at uminom ng alak noong panahon ng mangyari ang insidente," tipik sa gibutyag ni Kraft sa mga tigbalita.

Giila sa DCPO ang suspek nga Rolly Flores Cabiltes, alyas Buboy, 39-anyos, parking attendant sa Kilometer 5, Buhangin, ug taga Sulop, Davao del Sur kinsa temporaryo nga nagpuyo sa Bajada, Davao City.

Dugang ni Kraft nga mihaum ang cartographic sketch nga gihulagway sa testigo ug ang kuha sa closed-circuit television (CCTV) camera.

"Umayon po yong kuha ng CCTV pati yong cartographic sketch na binigay ng witness. So siya po talaga at siya po yong principal identification na siya po yong gumawa ng krimen... it corroborated to the suspect account that he was the one who killed the victim, more so, that he was positively identified by the eyewitness," dugang pamahayag ni Kraft.

Kahinumdoman nga Marso 1, 2021, patay nang nakit-an ang biktima sa sagbutan sa Ladislawa Village, Buhangin, diin anang Pebrero 28, nananghid ang biktima nga moadto sa usa ka tailoring shop sa San Pedro Village, Buhangin apan wa na kini makauli.

Kasong rape with homicide ang gi-file batok kang Cabiltes didto sa City Prosecutor’s Office niadtong Sabado, Hulyo 24, 2021, samtang anaa siya sa pagkustodiya sa Buhangin Police Station.