LIMA ka sumasalmot sa Indak-Indak sa Kadayawan 2022 ang misibog sa tigi tungod sa kakuwang sa pundo ug wa makakuha og suporta gikan sa ilang lokal nga panggamhanan.

"We should have supposedly a total of 15 contingents. They already started their rehearsals but unfortunately joining the event will also cost them a lot, ang ilahang pagkaon habang naga-rehearsal sila, costumes,musicians, [etc]," butyag ni Wadab Babao, Indak-Indak sa Kadayawan organizer atol sa AFP-PNP Press Conference sa Royal Mandaya Hotel niadtong Agosto 17, 2022.

Matud ni Babao nga ang pinakaulahing sumasalmot nga misibog mao ang gikan sa Sultan Kudarat.

Ang Indak-Indak sa Kadayawan dunay duha ka kategoriya; Open ug Davao-based schools. Alang sa open category, dunay lima ka mga sumasalmot aron nga magtigi sa P1 milyon nga ganting salapi, sila mao ang gikan sa Samal Island City College of LGU (local government unit) Island Garden City of Samal, CFCST-Palabuniyan Cultural Dance Ensemble gikan sa LGU-Pikit, North Cotabao, Sindac Anib Performing Ensemble gikan sa Bislig Surigao del Sur, Sidlakan Performing Ensemble gikan sa Malita, Davao Occidental ug Youth Olmag Performing gikan sa Arts Guild sa Kidapawan City.

Sa Davao-based schools nga entrante mao ang gikan sa Sta. Ana National High School Performing Arts Guild, Dona Carmen Denia National High School, Bernardo D. Carpio National High School Performing Ensemble, Mabini National High School Apo Duwaling Dance Company ug Tesda-Davao Region. (KSD)