KIDAPAWAN CITY -- Lain na sab nga insidente nga usa ka King Cobra o banakon nanghasi sa Magpet, North Cotabato.

Sumala pa nga hapit na untang tukbon sa banakon ang mag-uuma nga naglimpisa sa iyang maisan alas 9:20 sa buntag niadtong Martes.

Base sa saysay ni Leo Sumaldo, molupyo sa Barangay Binay, Magpet, nga samtang naglampisa siya sa iyang maisan, kalit lang nikamang ang dako kaayong banakon.

Dali siyang nakaiktad ug midagan padulong sa iyang payag aron nga di mapaakan sa bitin.

Apan gisundan hinuon siya niini ug misaka pa gyud sa payag.

Apan sa wa pa makaabot sa nahimutangan ni Sumaldo ang bitin, nakaandam na siya og lagaraw, hinungdan nga iya kining gitigbas sa ulo ug lawas ug namatay.

Nagpasalamat si Sumaldo nga wa mapaakan sa bitin nga migukod kaniya.

Kahinumduman nga daghan na nga mga molupyo sa probinsiya ang namatay sa milabay nga mga bulan tungod kay napaakan sa lala nga bitin.