PERTENG karansa sa usa ka ginang dihang gipangawat ang ilang mga gamit sa kusina, lakip na ang ilang karaang kaguran ug mga sartin nga plato.

Mipatim-aw sa Sta. Ana Police Station ang usa ka alyas Linda, 61-anyos, nagpuyo sa Purok 3, Barangay 23-C, Isla Verde, Quezon Boulevard, Davao City aron iyang ipa-blotter ang hitabo.

Nasayran nga buntag sayo niadtong Dominggo, perteng sukoa ni Linda ug grabeng yawyaw niini padungog sa mga silingan dihang ang iyang mga sartin nga plato nangawala.

Saysay ni Linda sa awtoridad nga napatik sa blotter report, dunay sentimental value kuno ang mga sartin nga nangawala gumikan kabilin kadto sa iyang mga ginikanan.

Lakip sa nawala ang ilang karaang kaguran nga iya sab sa iyang mga ginakanan.

Sumala ni Linda nga wala niya gikasakit ang kaguran, ang iyang gisayangan ang mga sartin nga plato.

Dunay suspek suma pa si Linda, ang silingan niining palahubog nga iyang kalalis niadtong Sabado sa buntag gumikan sa milapas nga kural sa ilang balay.

Karong Huwebes, nakatakda silang mag-abot sa barangay aron didto sila husayon.