NAGBAHAD ang Philippine Drug Enforcement Agency (PDEA) national office ngadto sa mga ginikanan sa mga menor de edad nga madakpan sa operasyon batok ilegal nga druga nga ilaha kining pasakaan og tukmang kaso gumikan sa pagpasagad sa ilang mga anak.

“Perhaps yes [We will file criminal complaints]. We would determine the degree of neglect of the parents,” ingon ni PDEA deputy director, Derrick Arnold Carreon, atol sa press conference sa Marco Polo Davao, Lunes.

Sa miaging semana, ang PDEA mipasaka og kaso sa mga ginikanan kinsa ang ilang mga anak nasikop sa usa ka drug den atol sa raid sa Navotas.

Ang mga gikanan gipasakaan og kasong pagsupak sa Republic Act 7610 kun Special Protection of Children against Abuse, Exploitation and Discrimination Act, ug ang Presidential Decree (PD) 603 kun Criminal Liability of Parents.

Niadtong Enero 16, atol sa Operation Plan “Save the Children,” sa Fishport, sa Barangay North Boulevard, Navotas City, si Carreon nagbutyag nga dose ka mga menor de edad nga gilangkuban sa babaye nag-edad 11 hangtud 15-anyos, ang ilang naluwas diin ang sagad kanila anaa na sa pagka “high” gumikan sa paggamit sa gidili nga druga.

“Karapat-dapat lang po para yong mga magulang ma-realize na hindi pababayaan yong mga anak nila,” ingon ni Carreon.

Di lamang sa Kaulohan kun di ipatuman kini sa PDEA sa tibuok nasud nga pasakaan gayod og kaso ang mga ginikanan kung mahitabo ang susama ngadto sa ilang mga anak.