SELOS ang gituohang hinungdan sa krimen human napatay sa lalaki ang kapuyo niining babaye sa adlaw nga natawhan sa biktima niadtong Nobyembre 11, 2021, didto sa Purok 11, Barangay Communal, Buhangin District, Davao City.

Padayon karon ang gihimong manhunt operation sa Buhangin Police Station batok sa suspek nga si Urbano Catulong, 36, taga Barobo, Surigao del Sur dihang misibat human iyang napatay ang kaipon nga si Maede Michelle Ochigue, 25, taga Davao de Oro.

Sa report sa kapulisan, nasayran nga gibunalan og botelya ang ulo sa biktima dayon gidunggab kini hangtud nga namatay diin human sa hitabo, gilayong misibat ang suspek.

Una niini, naglalis ang mag-partner sud sa ilang balay gumikan sa istorya sa giingong pagluib nga maoy hinungdan nga misangko sa krimen.

Luyo sa pagsubo sa pamilya sa biktima, nanawagan sila sa kapulisan alang sa hinanaling kasulbaran sa kaso ugaling masikop na ang suspek.

Huwebes sa hapon, wala pa mihatag og follow up report ang Buhangin PNP subay sa ilang gihimong manhunt operation.

Gihaya na sa mga kabanay ang biktima diin ang duha ka anak niini nga lalaki nagpangedaron og 3-anyos ug 5-anyos anaa karon sa poder sa ginikanan sa biktima.