GIPANGITA na sa mga awtoridad ang amahan nga giingong mipusil-patay sa hinigugma sa iyang anak didto sa Surallah, South Cotabato.

Lakip nga giukoy sa kapulisan sa Surallah Municipal Police Station (MPS) mao ang anak nga lalaki sa suspek nga giingong kuyog niini sa dihang gihimo ang krimen.

Nahitabo ang insidente alas 8:05 sa gabii niadtong Sabado, Hulyo 3, didto sa Sitio Matinong, Barangay Little Baguio sa nahisgutang lungsod sa nahisgutang probinsiya.

Ang biktima mao si Richel Berden Rubio, 33, molupyo sa Barangay Laconon, T'boli sa nahisgutang probinsiya.

Nasayran gikan sa taho sa Surallah MPS nga nahitabo ang pagpamusil samtang nagtan-aw lang og video sa cellphone si Rubio, uban ang ka live-in niini sa balay sa ilang barkada didto sa Sitio Matinong sa Surallah.

Kalit lang matud pa mibutho ang amahan sa live-in partner sa biktima, uban ang igsuon niini nga lalaki, ug nagpusil kang Rubio gamit ang kalibre .45 nga pistola.

Daling miikyas ang mga suspek sakay sa motorsiklo human nga napatay ang ulitawo kinsa nakaangkon og daghang samad pinusilan sa lawas.

Nasayran nga ang amahan dakong supak sa pagpakig-relasyon sa iyang anak nga babaye ngadto sa biktimang ulitawo.