GIANGKON sa suspek nga purok leader nga siya ang mipatay sa 13-anyos nga batang babaye kay gipasanginlan siya nga nangawat og iro.

Patay na sa dihang nakit-ang naglutaw sa sapa ang biktima nga dunay tinigbasan sa liog ug bun-og sa tiyan.

Napalgan ang biktima Martes sa hapon, Hunyo 30, 2020 sa sapa sa Barangay Pañalum, Paquibato District, Davao City.

Ang suspek nga si Mechor Euguis daling miangkon sa salaod dihang nasikop kini sa Paquibato Police Station ug gipatudlo sa gilabayan niya sa biktima nga 13-anyos.

Sumala ni Police Captain Mervin Montecillo, ang station commander sa Paquibato Philippine National Police, nga narekober sab ang sapatos sa biktima sa balay sa suspek diin giingong gisumbag pa kini sa tiyan ug dayon gitigbas sa liog.

Gihikay na ang kasong murder nga ipasaka batok sa suspek sa korte, samtang pamilya sa biktima nagbangutan sa nahitabo.