GIPAKLARO sa adviser sa LGBT Davao City Coalition Norman Baloro nga dili tinuod nga sirado na ang ilang giingon nga Google Form diin asa didto masumite sa ilang impormasyon ang mga anaa sa LGBT community sa Davao City.

Kini human nga daghan ang naguol nga mga LGBT nga taga Davao City kay wala na sila kasulod sa Google Form human nga giingong gisirhan sa miaging semana ang registration niini.

“Ipaklaro lang nato nga wala siya gisirhan, open siya for non-members, kay naa naman ta’y list sa atong mga members nga naay organization. Ang Google Form is for the LGBT Davao City Coalition na accredited organizations. In Davao, we have 92 accredited LGBT organizations. Para ma-accommodate sab nato ang non-members, kaya we opened sa Google Form,” ingon ni Baloro.

Giingon sab ni Baloro nga kung kinsa nga taga Davao ang dili member sa organization sa LGBT sa Davao, mamahimo nga mo-mensahe kanila sa official Facebook page nga LGBT Davao City Coalition aron ilang ma-tabangan sa pagsulod sa Google Form pinaagi sa paggiya sa link niini.

“Atoa silang i-verify kung taga Davao ba gyod. Ug ipahibalo lang pod nato nga dili ta tanan mahatagan sa pahalipay, we have 6,000 slots lang, but gidugangan nato og 1,000 para ma 7,000 para ang walay mga organization atong ma-accomodate. Nevertheless, we will find ways to accommodate everyone,” pasalig ni Baloro.

Matag bulan sa Disyembre, maghinam-hinam na ang mga LGBT sa Davao City alang sa ilang pahalipay nga gift certificate (Gift-Cert), pahalipay nga gidalit ni Davao City Mayor Sara Duterte ngadto sa nasampit nga komunidad.

Dul-an sobra dekada na ang pagpanghatag og gift-cert ngadto sa LGBT community sa Davao City agi’g pahalipay sa lokal nga panggamhanan sa syudad sa Davao.