DILI pa masulti sa kapulisan sa Bunawan Police Station kung gipanamastamasan una gipatay ang Grade 11 student nga gilabay sa sagbutan duol sa kanal sa Purok Taurus, Tambongon, Barangay Lasang, Davao City, alas 6 sa buntag, Martes, Abril 27, 2021.

Una niini, nananghid nga mokuha lang og module ang biktima apan wa na kauli.

Gisaysay sa inahan nga nakapanawag pa ang iyang anak nga di kauli kay ulan ug sa barkada na lang una kini ug mohapit sab tambong og birthday.

Apan pagka-alas 6 sa buntag, Abril 27, 2021, gidungog na lang nga dunay gi-salvage, kinsa gilabay sa sagbutang bahin duol sa kanal sa Purok Taurus nga dunay daghang samad dinunggaban sa kalawasan.

Ang inahan nga nahinabi sa dxDC RMN Davao nagkanayon, “wala na gyod koy mahimo nimo nak, ang Ginoo na lang ang labing nasayod sa tanan. Sa suspek, mo-ampo [surrender] na lang gyod ka.”

Ang biktima suma ni Barangay Lasang Kapitan Allan Simoag usa ka tinun-an sa A.L. Navarro National High School ug nagpuyo sab sa lugar.

"Dili pa nato ma-establish nga gilugos ang victim, ug padayon pa sab atong gihimong imbestigasyon sa hitabo," ingon ni Police Major Noel Villahermosa ang hepe sa Bunawan PNP.

Dunay nay mga persons of interest ang kapulisan sa maong krimen.

Ang patay nga lawas sa biktima anaa sa Rivera Funeral Homes alang sa autopsy.