TINGKAGOL sa prisohan ang unom ka mga batan-on nga nadakpan human nangawat og mga kanding alas 2:00 sa hapon, Martes, Agosto 16, sa M'lang, Cotabato Province.

Mga nadakpan mao sila Orgie Diosanta, 25; Micko Beboso, 19; ug Dave Quime, 21. Samtang ang laing tulo wala panganli kay pulos mga menor de edad.

Gibutyag ni Cotabato Provincial Police Office Director Colonel Harold Ramos nga nakadawat og taho ang kapulisan sa M'lang Municipal Police Station nga unom ka tawo nangawat og mga binuhing kanding sa mga barangay sa Pag-asa ug Nueva Vida sa nahisgutang lungsod.

Abtik nga nagresponde ang mga pulis ug nadakpan ang mga suspek nga nagguyod pa og tulo ka kanding nga itumod na unta sa palengke sa Makilala.

Ang grupo sa mga suspek maoy gitumbok nga nalambigit sa sunod-sunod nga pagpangawat og mga binuhing kanding nga ibaligya nila sa mga karenderya.

Narekober sa mga pulis ang mga kanding nga kinawat sa mga suspek, upat ka kutsilyo ug mga personal nga kagamitan.