TUNGOD sa selos napatay sa usa ka kapuyo ang iyang live-in partner nga babaye human sila nag-away gumikan alegasyong dunay sekreto nga hinimoan ang babaye sa laing lalaki.

Namatay ang biktima sa daghang dinunggaban sa lawas samtang mitahan sab sa kapulisan ang suspek nga si Cesar Gabin Bughao, hamtong ang pangedaron, taga Brgy. Lacson, Calinan, Davao City.

Subay sa spot report gikan sa Calinan Police Station, nasayran nga alas 7:30 sa gabii niadtong Martes, Hunyo 15, 2021, naglalis ang suspek ug ang biktima gumikan namasangil ang suspek nga dunay kulokadidong ang babaye.

Sa kasuko sa suspek sa ilang panaglalis, mikuha kini og kutsilyo dayon giayo'g dunggab ang biktima tumong sa nagkadaiyang parte sa kalawasan hinungdan sa iyang hinanaling kamatayon.

Gipailawom na sa inquest proceeding ang suspek kagahapong adlawa sa korte samtang gihaya sa iyang kabanay ang biktima.