DIGOS CITY -- Mitapon na sa laing dapit ang mga miyembro sa pamilya sa gipatay nga maestro human nabalaka sa ilang seguridad tungod sa mga hulga nga nadawat pinaagi sa text message.

Gikompirma sa kapulisan nga mihawa na sa dakbayan ang mga miyembro sa pamilya hinungdan nga ang mga higala na lamang sa magtutudlong si Felipe Niemes Jr., 52, ang nag-asikaso sa patay’ng lawas niini nga gihaya sa usa sa mga punerarya sa dakbayan.

Nasayran nga nangayo og pakitabang ang pamilya sa biktima ngadto sa kapulisan aron mo-escort kanila aron luwas nga makauli sa ilang balay.

Gibutyag sa mga tagtungod sa biktima nga adunay hulga sa ilang kinabuhi nga hutdon sila pagpatay human nalambigit ang usa nila ka kabanay sa investment scam.

Si Niemes Jr., senior high school (SHS) teacher sa University of Mindanao Digos College, gipatay samtang sakay sa tricycle sa Sta. Cruz sa miaging semana.

Nasayran nga ang pag-umangkon sa biktima, Nico Niemes, mao ang nisibat kay daghan ng investment scams ang giapilan isip agent.

Wa na igkita si Nico mao nga dunay pagtuo nga taho nga basin og gipanimaslan ang magtutudlo. (Orlando B. Dinoy)