GITUOHANG nasangit sa sanga sa mangga ug wala na kalupad ang usa ka drone nga dunay dala nga shabu, kon diin 250 metros lang ang gilay-on sa Davao City Jail.

Nagtuo ang awtoridad nga dunay motinguha unta nga mopasulod niini sa Davao City Jail gamit ang usa ka drone, sanglit hugot ang seguridad sa mga jail guards maong mihimo na lang sa susama niini nga paagi.

Apan pakyas kay nasangit sa mangga ang drone diin nakit-an sa mga bata alas 6 sa buntag niadtong Lunes, Oktubre 18, 2021.

Tungod niini, daling mitawag sa Talomo Police Station si Kagawad Martin Carillo Jr. sa Barangay Maa human nadiskubrehan sa mga bata didto sa Purok 25-B, People's Village, Barangay Maa, duol lamang sa Davao City Jail.

Usa ka DJI Spark Camera Drone, kolor puti ug gray diin anaa sakay niini ang tulo ka mga pakite sa gituohang shabu nga gibalot sa usa ka disposable surgical mask.

Motimbang sa 25 gramos ang tulo ka mga pakite sa gituohang shabu ug mokantidad sa P400,000.

Padayon ang gihimong imbestigasyon sa kapulisan ug kinsa ang nanag-iya sa drone camera aron mapahamtangan og silot.

Samtang sa laing bahin, pakyas ang tinguha sa duha ka mga indibiduwal nga misulay sa pagpasulod og gituohang shabu sa Davao City Jail, Oktubre 19, 2021.

Gibutang ang mga pakite ilawom sa adobong manok. Nagtingkagol na ang mga suspek sa selda sa Talomo police.