TUNGOD sa padayong pagsaka sa kaso sa African Swine Fever (ASF) sa duha ka lungsod sa North Cotabato, nagkadaghan usab ang mga nalugi nga mga hog raisers.

Matud ni Midsayap Agricultural Technologist ug ASF Task Force Provincial Information Officer Romar Quintero, niabot na sa P5-7 milyones ang gidaghanon sa mga baboy nga na-depopulate sa Midsayap, kon diin niabot og 1,600 ka baboy gikan sa 16 ka barangay nga kontaminado sa ASF.

Ning bag-o lang, ang lokal nga panggamhanan sa Midsayap nihatag na og inisyal nga hinabang pinansiyal sa mga apektadong hog raisers ug gilauman nga masunod ang pag-release sa cash ilabi na kadtong hog raisers nga "ensured" ubos sa Philippine Crop Insurance Corporation (PCIC).

Sa dili miyembro sa PCIC, hatagan sab sila og financial assistance.

Sa pagkakaron, nagpaabot na lang sila sa pag-aprobar sa deklarasyon sa state of calamity sa nahisgutang lungsod aron magamit na ang gikinahanglang pundo.

Samtang sa Pigcawayan, niabot na sa 831 ang gidaghanon sa de-populated nga mga baboy gikan sa 92 ka hog raisers o mag-uuma sukad Mayo 24, 2022 kon diin niabot ang damyos og P3,365,000.

Nagreklamo na ang mga apektadong hog raiers ug nanghinaut nga mabayran dayon.

Apan taliwala sa pagtaas sa mga kaso sa mga nahisgutang lungsod, gitugotan pa gihapon ang pag-ihaw og baboy ug ang pagbaligya niini basta mosunod lang sa saktong proseso nga gilatid sa lokal nga panggamhanan kon diin kinahanglan nga negatibo sa ASF ang baboy ug sa slaughterhouse ra sa matag barangay ihawon kini.

Matud sa DA nga ang pagbaligya ug pagbayloay sa baboy kinahanglang anaa sa mga giila nga red zones lamang o mga lugar nga adunay ASF. Kon green zone ang lugar, nagpasabot nga ASF-free kini busa bawal ang pagbaligya o pagpalit og buhi o karne sa baboy.