NADAKPAN ang usa ka isnatser dihang nabangga ang gisakyan niini nga motorsiklo samtang mosibat unta human nanglabni og kwentas sa usa ka Indian national, Sabado sa hapon, Mayo 4, didto sa Doña Vicenta, Barangay 10-A, Poblacion, Siyudad sa Davao.

Balhog karon sa prisohan sa San Pedro Police Station ang usa ka Arjay Fuerzas Lawis, 27-anyos, residente sa Gotamco, Barangay Leon Garcia, Agdao District, human kini madakpan sa mga otoridad sa Jacinto Extension, ning dakbayan.

Giingon nga naglakaw ang langyaw nga estudyante sa Mariner Street aron mopalit og pagkaon, ug kalit giduol sa suspek dayon gilabni ang kuwentas nga mokantidad og P40 mil.

Daling misakay ang suspek sa motorsiklo nga gimaneho sa iyang kauban nga si alyas Regor nga naghulat sa unahan, ug nanibat agi sa dalang Jacinto Extension.

Apan malas sa duha ka suspek, gumikan sa pagdali-dali, nakabangga sila og usa ka sakyanan hinungdan sa pagkasamad ug sa pagresponde sa kapulisan, nadakpan hinuon ang suspek, apan ang kauban niini nga driver sa motor ang nakasibat human iyang gibiyaan ang usa dihang nadasmag sila.

Narekober sa posisyon ni Arjay ang kwentas sa Indian national, diin ning kasamtangan giasikaso na ang kaso nga ipasaka batok sa suspek didto sa korte.