DIGOS CITY -- Gianunsyo sa kapulisan nga nasikop nila ang usa ka barangay kagawad human nasakpang namaligya og "overpriced" nga mga disinfectants human gipailawom kini sa buy-bust operation, Sabado sa hapon, Abril 4.

Si Lieutenant Colonel Vici Anthony Tababa, city police director, nag-ila sa dinakpan nga si Gina Lascuña Hayag, 33 anyos, minyo ug barangay kagawad sa Tiguman.

Matod ni Tababa nga ang suspek gipailawom sa buy-bust operation nga gihikay didto sa dalang Luna Extension sa Barangay Zone 3 ala 1:15 sa hapon.

Sumala sa opisyal nga si Hayag naaktuhan nga nagtago ug namaligya og mahal nga presyo sa mga produktong ethyl alcohol ug nakumpiska sa posisyon niini ang 11 kabuok nga 170 ml ethyl alcohol, lima ka galon nga liquid hand sanitizer wa'y label, duha ka galon nga Navarro bleach hand sanitizer, upat kabuok nga 500 ml, naturacy powder freshen sanitizer, napulo ka galon nga mango fury wa'y label, usa ka resibo nga aduna'y printa nga Hayag Passin Collection ug marked money kantidad P1,000.

Ang naaresto nga suspek ug mga nakuhang ebedensya gidala na sa Digos City Police Station diin giandam na ang kasong paglapas sa RA 7394 kun Consumer Act of the Philippines. (Orlando B. Dinoy)