DAVAO DE ORO -- Anaa na sa luwas nga kahimtang ang kagawad sa barangay nga girapido sa wala mailhing armado sa Barangay Anislagan, Nabunturan alas 7:05 sa gabii, Dominggo, Hunyo 4, 2023.

Ang biktima giila nga si Rodolfo Pilones Kudera, Jr., 47, minyo, molupyo sa Purok 2 sa nahisgutang lugar.

Nasayran base sa gihimong imbestigasyon sa kapulisan sa Nabunturan Municipal Police Station nga ang biktima padulong na unta nga mosulod sa iyang balay gikan sa likod nga bahin sa nataran niini.

Apan usa ka wala mailhing lalaki nga miduol kaniya ug sa walay daghang istoryal gipusil siya sa makadaghang higayon tumong sa nagkadaiyang parte sa lawas.

Human mahimo ang tuyo, dali sab nga mikagiw ang suspek paingon sa wala masayring direksiyon samtang ang biktima gidali pagdala sa iyang mga silingan ngadto sa Davao De Oro District Hospital-Montevista.

Narekober sa mga awtoridad gikan sa crime scene nga tulo ka basiyo ug tulo ka buhing bala sa caliber 9mm.

Sa pagsuwat ning balita, giingon nga ang biktima anaa na sa luwas nga kahimtang samtang mga kapulisan padayon nga milusad og pagpanubay aron nga madakpan ang suspek ug matumbok ang motibo sa pagpamusil.