BANSALAN, Davao del Sur -- Way nahimo ang mga kaalyadong konsehal sa suspendidong mayor sa lungsod gawas sa pagpirma og resolusyon aron tugtan ang gitudlong acting mayor nga molagda og mga transaksiyong pinansiyal sa lokal nga gobyerno.

Usa ka special session ang gihimo sa Sangguniang Bayan (SB) niadtong Martes, Abril 23, diin giaprobahan sa konseho ang otorisasyon ni acting Mayor Edwin Reyes nga makahimo og transaksiyon sa mga bangko ug uban pa.

Sumala ni Konsehal Eddie Jesus Godoy nga milagda silang tanan sa maong resolusyon lakip ang unom ka mga konsehal nga unang mibabag niini.

Nasayran nga gibabagan sa mga konsehal nga sila Wilan Granada; Peter Menguito; Rodolfo Cartin; ABC president Mindanito Mabanag, Eugene Clata ug SK Federation president Noriel Zamora, nga mahatagan og otoridad si Reyes samtang ang uban di mouyon nga magpadayon si Sarte nga mogunit sa operasyon sa munisipyo gawas sa hisgutanang pinansiyal.

Apan dihang mipatunga ang rehiyonal nga buhatan sa Department of Interior and Local Government diin nagpasabot nga mahimong ireklamo ang mga opisyal nga maoy makabalda sa transaksiyon sa gobyerbo, gilayong giplantsa sa konseho ang ilang kasamok.

Gihangop dayon sa mga kawani sa munisipyo ang maong kalamboan human apil silang nadamay sa kaguliyang human wa sila maka-suweldo. (Orlando B. Dinoy)