PIKIT, North Cotabato -- Unom ka mga binuhing hayop ang gipamusil patay sa mga armadong grupo nga gituohang mga miyembro sa Bangsamoro Islamic Freedom Fighters (BIFF).

Ang insidente nahitabo alas 3 sa hapon niadtong Biyernes sa Sitio Valencia, Barangay Bualan, Pikit.

Base sa North Cotabato Police Provincial Office nga gisulod sa mga armadong mga BIFF ang dapit ug gipamusil ang mga gitugway nga baka ug kabaw sa mga molupyo.

Dali sab dayong miikyas ang mga armado aron nga di maabtan sa mga nagresponde nga mga sakop sa Citizen Armed Forces Geographical Unit (Cafgu) ug Barangay Peacekeeping Action Team (BPAT).

Lima sa mga binuhing baka ug usa ka kabaw ang natusak-tusak sa bala hinungdan nga namatay.

Kahinumdoman nga niadtong miaging adlaw, usa ka sakop sa Cafgu gipatay sab sa mga miyembro sa BIFF.

Giila ang biktima nga si Rodel Abellanida nga nagtugway lang sab sa iyang baka.

Grupo ni Kumander Duren Manampan sa BIFF ang gitudlo nga nangulo sa pagpatay sa mga binuhing baka sa maong dapit. (Edgar E. Fuerzas)