TALIWALA sa natigayong sunog pasado alas 10 sa gabii niadtong Miyerkules (Mayo 5) sa Purok 13, Barangay Tibungco, Davao City, migula ang mga istorya nga dunay nakita ang mga residente nga midupa nga daw agta sa karaang punoan sa Acacia sa dapit.

Giingong maoy hinungdan nga wala na katabok pa ang kalayo sa pikas purok gumikan gipataliwalaan kini sa century-old nga acacia.

"Nadugangan among kalisang kay sa pagpanagan namo, nakita gyud namo dako kaayong agta nga midupa, mao tong daw mibalhin ang huyop sa hangin, wala na gyud katabok sa pikas purok," ingon ni Narciso, 72 anyos, lumad sa maong dapit.

Gisaysay sab sa edaran nga taw-an na kaayo ang maong dakong punoan sa acacia diin suma niini, sumad napulo na sab ka tuig natigayon ang dakong sunog sa dapit.

Bisan pa man sa mga tinuhoan, nagpabilin gihapon sa kasubo ang nabiktima sa sunog diin mokabat kapin kun kulang 190 ka mga balay.

Luyo sa natigayong sunog, usa ka 84 anyos nga lola ang namatay kinsa na-trap human sa paspas nga pagkanit sa kalayo sa kabalayan sanglit sagad sa mga balay gama sa mga light materials.

Gidali sab og dayong sa mga naglamay ang lungon padung sa kalsada aron di maangin ang minatay sa sunog.

Subay sa inisyal nga imbestigasyon sa Bureau of Fire Protection (BFP) Panacan Fire Station usa ka kandila ang nabiyaan sa usa ka pamilya.

Wala pa sab gikabutyag sa BFP ang damyos sa maong hitabo.

Ning kasamtangan, padayon ang pag-validate sa taga City Social Welfare and Development Office sa mga nasunogan alang sa hinabang pinansyal nga madalit sa lokal nga kagamhanan sa siyudad sa Davao.