RIDO o personal nga dumot ang gilantaw sa mga awtoridad nga motibo sa pagpusil-patay sa negosyante kinsa kanhi kandidato pagkakonsehal sa munisipyo alas 4:05 sa buntag, Martes, Septyembre 20, 2022, sa probinsiya sa Cotabato.

Giila ang biktima nga si Edwin "Bon-Bon" o Bon Jovi Sindatok Edzla, kandidato pagka-konsehal sa Datu Piang, Maguindanao Province apan naparot sa milabay nga piniliay.

Matud ni Midsayap Chief of Police, Lieutenant Colonel Rolly Oranza nga sakay ang biktima sa iyang gimaneho nga Isuzu DMax pickup nga may plakang LFJ 269 sa Quezon Avenue, Barangay Poblacion 5, Midsayap sa diha nga kalit nga gitaparan sa riding in tandem suspects ug gipusil gamit ang kalibre .45 nga pistola.

Dali sab dayong misibat ang mga mamumuno sakay sa motorsiklo nga walay plaka.

Dead on the spot ang biktima human nakaangkon og daghang samad pinusilan sa nagkadaiyang parte sa lawas.

Samtang gikondena ni Midsayap Mayor Rolly "Ur the Man" Sacdalan ang pagpatay sa biktima.

Gikanayon sa mayor nga personal siyang naalarma sa sunod-sunod nga pagpamusil patay sa Midsayap.

Busa gitahasan ni Sacdalan ang kapulisan sa Midsayap Municipal Police Station nga palig-unon pa ang seguridad sa lungsod alang katawhan.