BULUAN, Maguindanao - Suportado sa militar ang pagdagan isip konsehal sa kanhi lider sa Bangsamoro Islamic Freedom Fighter (BIFF) sa Maguindanao.

Gibutyag ni Lt. Colonel Harold Cabunoc, 33rd Infantry Battalion Philippine Army commanding officer, nga maayo kini nga indikasiyon sa gipursige nga kalinaw sa Mindanao.

Si Sindatok Delna, alyas Kumander Motolite, midagan pagka-municipal councilor sa Datu Paglat, Maguindanao.

Una na nga giluwatan ni Motolite nga siya nakighiusa sa tanang programa nga gipursige karon ni Pangulong Rodrigo Duterte ilabina ang war on drugs ug terorismo ingon man ang pagkab-ot sa kalinaw pinaagi sa Bangsamoro Organic Law (BOL).

Gidugang ni Cabunoc nga makonsidera kining pinaka-una nga higayon nga usa ka BIFF surrenderee nga misulod sa politika.

Nanghinaot si Motolite nga siya suportahan sa katawhan aron sab siya makatabang sa pagpalig-on sa seguridad sa Datu Paglat batok sa mga dautang pundok.

Una na nga misurender si Kumander Motolite niadtong miaging tuig gumikan sa pagpaningkamot ni Cabunoc ug ni Governor Esmael Toto Mangudadatu.