HITSAS na ang kapulisan sa Davao City Police Office (DCPO) alang sa ilang plano ug bisan ang ihap niini alang sa seguridad sa Pasko Fiesta 2019.

Sa impormasyon gikan sa DCPO, pinaagi ni acting public information officer Police Captain Rosario Aguilar, gihimo ang send-off ceremony niadtong Huwebes, Nobyembre 21, sa DCPO parade ground.

“Kompleto ug hitsas na ang plano sa kapulisan sa DCPO alang sa mga nagkadaiyang assignment kon diin asa sila madestino sa pagbantay sa palibot alang sa atong seguridad karong Christmas season sa Davao City,” butyag ni Aguilar.

Sama sa naandan, ang DCPO mohimo og layer security diin asa una masudlan og tawo ang dapit asa gipahigayon ang mga kalingawan moagi pa kini sa makuti nga pagrekisa sa mga dala ug pag-kap kap.

Naa sab sa maong layer-security ang presensiya sa mga police auxiliary ug bisan ang kasundalohan pinaagi sa Task Force (TF) Davao.

Hugot sab ang seguridad sa tulo ka mga checkpoint pasulod sa dakbayan aron maseguro nga walay makasulod nga dautang mga tinguha.

Ang lokal nga kagamhanan sa siyudad nag-agni sa katawhang Dabawenyo nga makigduyog sa mga programa sa Pasko Fiesta uban sa kalingawan ug mga ipangtunol nga grasya. (Jeepy P. Compio)