MATANAO, Davao del Sur -- Gilayong gi-abisohan sa lokal nga gobyerno ang katawhan sa lugar nga di mag-panic human nabaniog nga aduna'y 9 anyos nga batang babaye kinsa nag-positibo sa coronavirus disease (Covid-19).

Giulan og komento ang social media human gikumpirma sa lokal nga gobyerno nga natakbuyan sa Covid-19 ang bata.

Apan, sumala ni Mayor Vincent Fernandez nga inay magkaguliyang angayang motuman sa tanang protocol aron di mataptan sa kagaw.

Sumala ni Fernandez nga mahimong likayan una ang pag-adto sa mga pampublikong dapit ug di una mobyahe kun di mahinungdanon ang paglakaw.

Ang mga nag-edad og 20 anyos paubos ug 60 anyos pataas ilabi pa kung aduna'y balatian sa panglawas, mas maayong di una mogawas sa panimalay.

Gikinahanglan sab ang kanunay nga paghugas og kamot gamit ang sabon ug tubig ug pagamit og alcohol sa tanang higayon.

Giawhag sab sa mayor ang publiko nga obserbahan ang 2 metros nga social distancing ug kanuna'y nga magsul-ob og face mask.

Kanunay nga gipahimagnoan ang mga establishemento nga kinahanglang 50 porsyento lamang ang makasud sa ilang lugar.

Sa kasamtangan, naka-admit sa Southern Philippine Medical Center didto sa Davao City ang pasyente ug ginasubay na ang exposure niini lakip ang paghimo sa contact tracing. (Orlando B. Dinoy)