COTABATO CITY -- Hustisya ang singgit sa pamilya sa gipatay nga empleyado sa Department of Public Works and Highways (DPWH) sa siyudad human gipusil alas 8:20 sa gabii niadtong Dominggo.

Ang biktima mao si Michael Macion Laranjo, 45, minyo, ug nagpuyo sa Virgo Subdivision, Barangay Rosary Heights 9 sa dakbayan.

Sa taho gikan Cotabato City Police Office, nasayran nga naglakaw lang si Laranjo Purok 7 sa maong subidibisyon, giatngan siya og duha ka wala mailhing lalaki ug gitirohan og kalibre .45 nga pistola.

Patay gilayon ang biktima human makaangkon og samad sa ulo ug likod nga bahin sa lawas.

Sumala sa mga nakasaksi sa hitabo nga di nila maaninaw ang dagway sa mga suspek gumikan kay ngitngit sa lugar nga nahitaboan.

Daghan ang nagtuo nga posibleng dunay kalabutan sa trabaho sa biktima ang pagpatay kaniya kinsa giingong kanunay nga mokuyog sa mga ilusad nga road clearing operation sa siyudad.

Hinuon, gisuta pa og maayo sa kapulisan ang tinuod nga motibo sa pagpatay sa biktima. (Edgar E. Fuerzas)