NABANIOG sa usa ka Purok sa Barangay 76-A, Bucana, Siyudad sa Davao nga usa ka "kikik" ang maningilay og utang, diin suma pa, paagi kini aron mahadlok ug makabayad ang mangutangay.

Niadtong Biyernes sa gabii, Hunyo 24, 2022, nabaniog ang maong impormasyon human alas 11 sa gabii, miagi si alyas Tasing, 54-anyos, nagpautang og mga "ready to wear" (RTW) ngadto sa balay ni Gerlie (bansagon gitago), 38-anyos.

Nasayran nga miingon lamang si Tasing nga magsayo kini og paningil pagkaugma kay lima na suma pa ka adlaw wala kabayad si Gerlie sa tag P25 ang adlaw sa iyang giutang nga mga RTW.

Subay sa saysay ni Gerlie sa SuperBalita Davao, diha dayon kalit nga misibat ang tigpautang ug perte kakusog sa tingog sa Kikik nga gituohan ni Gerlie nga si Tasing.

Pagkaugma, gisukmatan si Tasing sa silingan ni Gerlie nga gipanabi niini nga kikik kini, hinungdan nga perteng sukoa ni Tasing ug hapit niya kining dumoga.

Gisulong ni Tasing si Gerlie ug gisukmatan sa pagpanabi niini nga siya kikik, apan gihimakak niya kini.

Gilayong midangop si Tasing sa buhatan sa San Pedro Police Station aron ipa-blotter ang maong hitabo.

Nakatakda silang mag-abot sa Barangay 76-A, Bucana aron didto sila husayon.