DIGOS CITY -- Suspendido gihapon ang klase sa tanang pribado ug publikong tunghaan sa dakbayan gawas sa mga magtutudlo nga kinahanglang moadto sa eskwelahan.

Subay sa direktiba nga gipaguwa ni Mayor Josef Fortich Cagas, ang mga magtutudlo ug mga non-teaching personnel ang padayong mosusi sa ilang mga lawak ug uban pang istruktura sa tunghaan.

Ang mga trabahante, mag-depende sa suhestiyon sa ilang mga employers kun gikinahanglan nga mobalik na.

Giklaro sa mayor nga tanang magtutudlo ug trabahante sa publiko ug pribadong tunghaan ang angayan nga mosusi sa ilang mga tunghaan.

Gikinahanglan sab nga mohimo og mga extra-precaution samtang anaa na sa tunghaaan sanglit matag karon ug unya ang nasinating aftershocks.

“If damage is found sa atong mga building, please contact the City Government aron ma-inspection dayon sa team,” sumala sa opisyal.

Una niini, si Davao City Mayor Sara Duterte-Carpio ang nagmandu sa Department of Education (DepEd) Davao Region nga kini ang unang buhaton sanglit padayon ang natigayong aftershocks. (Orlando B. Dinoy)