MAGPET, North Cotabato -- Patay ang usa ka kolektor sa goma human kini gipusil alas 5:25 sa hapon niadtong Miyerkules, Hulyo 18.

Giila ang biktima nga si Neil John Navarra Blancaflor, 35, ug molupyo sa Barangay Maleri, Antipas sa nahisgutang probinsiya.

Gibutyag ni Superintendent Bernard Tayong, tigpamaba sa North Cotabato Police Provincial Office, nga sakay ang biktima sa iyang motorsiklo sa Barangay Poblacion sa nahisgutang lungsod gikan nangolekta og goma ug pauli na unta kini sa iyang balay.

Apan duha ka wala mailhing lalaki ang mitumaw ug mipusil niya. Patay gilayon si Blancaflor nga nakaangkon og samad pinusilan sa ulo ug likod nga bahin sa lawas.

Giingong mga suspek nga miikyas, nakasul-ob og helmet, hinungdan nga wala mailhi sa mga nakasaksi.

Sumala sa pamilya sa biktima nga wala kini nakaaway sa ilang dapit busa imposibleng nga patyon kini.

Hangtud karon blangko pa ang kapulisan sa Magpet Municipal Police Station sa motibo sa pagpatay sa biktima. (Edgar E. Fuerzas)