NEW BATAAN, Compostela Valley -- Kasong reckless imprudence resulting to multiple physical injury ang atubangon sa usa ka kompaniya sa bus human mahulog sa pangpang ang usa sa ilang mga yunit alas 3 sa hapon, Miyerkules, Septiyembre 4, sa Barangay Camanlangan, New Bataan.

Sa report sa Police Regional Office (PRO) Davao Region, nasayran nga usa ka yunit sa Davao Metro Shuttle Bus, dunay body number 658, ug naka-temporary plate number 1301-1344115 nga rehistrado sa Davao Metro Shuttle Corporation, sa Magugpo West, Tagum City ang nahulog sa pangpang.

Ang maong bus gimaneho ni Mychilou Dela Cruz Loquellano, 42, residente sa 468, Purok 7, Aguinaldo St. Maniki, Kapalong.

Sa inisyal nga imbestigasyon sa traffic section sa New Bataan Municipal Police Station, nasayran nga nawad-an og kontrol ang nasampit nga bus sa Purok 6, Barangay Magangit.

Una niini, alegasyong nakatulog ang maong drayber hinungdan nga nadiretso ang bus sa lawom nga bahin kilid sa kalsada nga dunay gilawmon nga 20 ka peye.

Gilayong miresponde ang Nabunturan Emergency Response Team diin lima ka mga pasahero ang nakahiagom og daghang bun-og sa kalawasan nga gidala sa Comval Provincial Hospital-Montevista aron mapatambalan.

Temporaryong gibalhog sa New Bataan MPS ang nasampit nga drayber, samtang sa pagsuwat ning balita, wala pa mihatag og pamahayag ang pamunoan sa Davao Metro Shuttle Corporation labot maong hitabo. (Jeepy P. Compio)