DAKONG kawala sa bahin sa komunistang grupo dihang napatay ang usa ka taas nga lider ug lain pang usa ka kauban sa lehitimong operasyon sa mga awtoridad ala 1:15 sa kaadlawon Huwebes, Disyembre 10, 2020.

Sumala pa sa taho nga mga awtoridad magsilbi unta og warrant of arrest kang Alvin Loque, nailhan sab nga Joaquin Jacinto, miyembro sa "execom" sa Komisyon Mindanao ug kanhi tigpamaba niini didto sa Hermenias Resort, Purok Milion, Barangay San Agustin, Tandag City, Surigao del Sur.

Giingong nakamatikod ang grupo ni Loque sa nagsingabot nga mga awtoridad, hinungdan nga nipabuto siya sa iyang armas samtang ang iyang kauban nipabusikad og granada.

Maayo na lang kay abtik ang mga awtoridad ug dayon nakalugar og bawos nga miresulta sa kamatayon sa mga suspek.

Nakuha gikan sa posisyon sa mga suspek ang mga armas, granada, blasting cap, firing mechanism sa improvised explosive device, bandela sa New People's Army ug uban pang mga dokumento sa kalihukan.

Nasayran nga si Loque dunay warrant of arrest sa duha ka ihap sa kasong murder, kidnapping ug serious illegal detention.

Nagtuo ang mga awtoridad nga lain na sab kining pagkapiang sa ilang kalihukan. (Uban ni RGV)