CENTRAL MINDANAO -- Hugot nga gikondena ni Guindulungan Mayor Midpantao Midtimbang Jr. ang pag-ambush patay sa municipal councilor ug pagkasamad sa duha niya ka mga security escorts.

"I condemn this atrocity. We are hoping for a prompt action on this by authorities," pahayag ni Midtimbang Jr.

Nahitabo ang pag-ambush patay sa konsehal nga si Morsid Midtimbang Lauban ug pagkasamad sa duha niya ka closed-in escorts alas 8:15 sa buntag kagahapon, Lunes, Septyembre 28.

Nasayran gikan sa taho ni Maguindanao Police Provincial Office Director Colonel Arnold Santiago nga sakay ang mga biktima sa Toyota pick-up gikan sa Cotabato City.

Apan sa dihang niabot na sila sa may utlanan sa Guindulungan ug Talayan sa maong probinsiya, kalit silang girakrakan sa wala mailhing armadong mga lalaki gamit ang mga tag-as nga matang sa armas.

Patay gilayon si Lauban sa dihang naigo sa daghang mga bala ang lawas samtang gihatud ngadto sa Cotabato Regional and Medical Center sa siyudad sa Cotabato ang duha niya ka mga escorts.

Ang mga suspek dali sab nga misibat sakay sa matud pa usa ka multicab.

Sa pagsuwat ning balita, blangko pa ang mga awtoridad sa motibo sa pag-ambush patay sa konsehal ug pagkasamad sa iyang mga escorts ug padayon pa ang ilang imbestigasyon.