GITUMBOK sa Davao City Health Office (CHO) ang "unhygienic street food" nga maoy hinungdan sa diarrhea outbreak sa Toril District nga niresulta sa 217 ka mga indibiduwal nga naapektuhan.

Gikanayon ni CHO Head Dr. Ashley Lopez sa pakighinabi sa radyo niadtong Biyernes sa buntag, Hulyo 29, nga base sa resulta sa rectal swab, ang outbreak hinungdan sa "food-borne microorganism with vibrio cholera as the pathogen of concern."

"The most likely vehicle of transmission is not water, but rather contaminated food," pagtataw ni Lopez sa paghinabi kaniya sa 87.5 FM Davao City Disaster Radio.

Ang opisyal nagkanayon nga base sa imbestigasyon, ang pagkaon nakontamina samtang giandam ug ang pagdumala sa "infected" nga naghimo.

Matud niya nga mga tinubdan nga na-infected mao ang tapioca drink ug street food, ilabi na ang isaw, kwek-kwek, ug juice, nga gibaligya sa night market sa Rasay Street ug Toril Public Market.

Dugang pa niya nga ang tapioca nga ilimnon mao ang "primary cause of infection", ug kini ang naimom sa mga kasong kritikal.

Tungod niini, mga awtoridad sa panglawas nagpadaplin na nga ang "water-borne bacteria" maoy hinungdan sa outbreak tungod kay ang resulta sa eksaminasyon sa Research Institute for Tropical Medicine (RITM) nagpakita sa mga "samples" nga nakuha gikan sa mga tubo sa Davao City Water District (DCWD) negatibo sa "bacterial contamination".

Ug base sa ilang imbestigasyon, gisulti ni Lopez nakakaplag nga 41 porsiyento sa mga naapektuhan nga kaso nakakaon sa night market, 21 porsiyento sa public market, ug 38 porsiyento gikan sa daghang mga tinubdan.

Sukad Hulyo 28, gikanayon ni Lopez nga sa 217 ka mga kaso, 48 pabiling aktibong kaso, samtang 163 nakarekober na, ug unom namatay sa diarrhea, pinakaulahi mao ang 27 anyos nga lalaki kinsa namatay niadtong Hulyo 15 tungod sa "cardiopulmonary arrest secondary to severe dehydration".