DAVAO DEL SUR -- Namatikdan sa Davao del Sur Police Provincial Office (DSPPO) nga mikunhod ang mga nag-unang krimen sa unang quarter ning tuiga kon diin nagkapuliki ang publiko sa paglinya sa mga investment scheme.

Sumala sa ubang mga molupyo nga busy kanunay ang pipila sa pagpangita og mga kapital aron motubo inig makaapil sa mga investment scheme nga adunay 30-400 porsiyentong usbaw.

Apan, si Major Darwin Dura, tigpamaba sa DSPPO, nagbutyag nga ang pagkunhod sa krimen maoy epekto sa gipakusgang police operations, checkpoint sa national highway ug patrolya sa kadalanan.

Sumala ni Dura nga dako sab og gikatampo ang “Oplan Davao Kalinaw” nga miresulta sa pagkatanggong sa mga kolorum nga sakyanan ug motorsiklo.

Sagad ginagamit sa mga kriminal mao ang mga way plakang motorsiklo nga ubay-ubay na ang nasikop.

Nagpadayon sab ang election gun ban nga motak-op sa Hunyo 12, tuig kasamtangan.

Mas dako sab og gikatabang ang implemenstasyon sa Martial Law dinhi sa Mindanao diin usa mga nahimong hinungdan sa pag-ubos sa krimen. (Orlando B. Dinoy)