ANG Chinese Community sa Davao City mopahigayon og mga nagkadaiyang pasundayag nunot sa Chinese New Year sa Martes, Pebrero 5, subay sa Chinese calendar.

Kini ang gipatik sa Facebook Page sa Davao Chinese Community diin mopahigayon sila og mga programa sa nagkadaiyang dapit ning dakbayan.

Sa naandan sa kanto Jose P. Laurel Avenue, Bajada duol sa Chinese School, ipahimutang ang mga pasundayag diin mobida ang mga pagkaon nga ginama sa mga Chinese.

Una niini ang “Nian gao” kun mas nailhan sa “tikoy” ang mobida sa mga pagkaon nga mapalit atol sa programa.

Sa Chinatown sa Uyanguren, Ramon Magsaysay Avenue, nagkadaiyang pakolo ang gipakita sa matag tindahan sa mga Chinese alang sa ilang mga kustomer.

Nagpasalamat sab ang Chinese community sa lokal nga kagamhanan sa Davao City sa maayong relasyon nga gipaambit niini sa hataas na nga katuigan nga miresulta sa ilang dugay na sab nga pagtinir sa dakbayan isip mga nag-unang mga negusyante. (Jeepy P. Compio)