GIDALA sa usa ka tambalanan sa Tagum City ang usa ka foreman human gitigbas sa bana sa iyang kabit, Lunes sa hapon, Marso 18, sa Barangay Colosas, Paquibato District, dakbayan sa Davao.

Giila ang biktima nga usa ka alyas Lonzo, 50, foreman sa usa ka proyekto nga ginatukod sa lugar ug residente sa Island Garden City of Samal (Igacos) sa Davao del Norte, samtang ang suspek giila nga si alyas, Alex, 31, mag-uuma, residente sab sa maong dapit.

Nasayran nga nag-istorya ang biktima uban sa iyang mga kauban sa trabaho dihang kalit miabot ang suspek dala ang usa ka lagaraw dayon tigbas ngadto sa biktima didto sa trabahoan.

Ang biktima nga nakabantay, gisagang ang pagtigbas kaniya hinungdan sa pagkaputol sa usa niini ka tudlo ug pagkasamad sa iyang kamot.

Dugang impormasyon nasayran nga dugay na nga nagdumot ang suspek ngadto sa biktima gumikan kay gikabit sa biktima ang asawa sa suspek diin miabot na sa unom ka bulan ang ilang relasyon.

Human sa insidente misibat dayon ang suspek samtang ang biktima gidala sa ospital.